ايام أول... أيام أ نتشرت فيها الخرافة بشكل كبير..وهذا اللي محلنها

- بوبشير، وهو حشرة ضعيفة وطويله ولها يناحات طوال، كانوا يعتقدون إذا شافوه إنه يبشر عن ضيف قادم أو عمل ناجح او المطر راح ينزل

- بو النقيع هو حشرة من فصيلة الخنافس، كانوا يمسكونها بإيدهم ويتمنون أمنية إذا نقع بتحقق الأمنية وإذا لا ما بتحقق.



- الطيطار إذا انضرب وانقطع ذيله لازم ينحط على الذيل شيء لأنه يدعي على أهل البيت. منو خاطره في طيطار مقلي ولا مشوي على الطريقة الافريقيه شو لاعت جبودكم ؟


- هاي حق اهل البحر بس إذا بتاكل السمجة لازم تقطع راسها قبل ما تبتدي فيها.


- تعالو يا الشعراء هاي لكم اصحاب المهياوه ما يخصهم : يقولون اللي ياكل لسان الذبيحة يستوي شاعر.


- الماي مب زين ينشرب حزة الغروب، لأنه يمرض.


- يوم بتي ترقد لا تحط الماي عند راسك لأنه يخف نظر العين. حطوه تحت المخده


- كانوا يقولون رقاد العصر يقصر العمر.


- النعال ( عزكم الله ) مب زين يتم مجلوب، لأنه يدعي على أهل البيت أو تستوي مشاكل وضرابه وتكفيخ .ويقولون حرام اتم الجهة السفلية من النعال مجابلة السما لان فيها الله...(انزين والوسخ المكود ع الارض...ما يجابل السما؟)


- كانوا يدخنون بالشبه لأنه يطرد الحسد.


- كانوا يقولون إذا رفت العين اليمين خير، وإذا رفت العين اليسار شر.



- إذا كفك اليمين حكك يعني بتعطي حد فلوس، وأذا اليسار بتقبض فلوس(( أظني كل حد بيتمنى يده اليسار تحجه)).


- إذا خشمك (الأنف) حكك يعني بتسلم على شخص ياي من بعيد.


- إذا الأذن صاحت يعني حد يطريك يا بالخير أو بالشر.


- أذا كان شخص طالع وناديته أو قلتله لا تطلع (( يعني تنعبه - تزقره بلهجتنا )) مب زين، لأنه يمكن يستويله شي.


- الحرمه المربيه لازم ما تطلع من البيت ولا ينقال إلها خبر مب زين إلين ما تطلع من الأربعين.


- الياهل ( الطفل ) لازم يحطون في منزه ( مهده ) سكين وملح وقرآن، عشان يحفظه الله بالقرآن، والسكين والملح عن الجن. طبعا اليوم يحطون حق عيال النيدو والسيريلاك تلفون متحرك وقنوات فضائيه وبلاي ستيشن .


- الياهل يوم يطلع من الأربعين لازم يسبحونه على ريول أبوه أو أي حد ثاني عشان يطلع على اللي مسبحينه عليه.