[align=center]السلام عليكم...


محاضرة .. ومربية .. كل يوم تحاضر فمكان ... تنصح الناس وتوجههم ... وتصرخ بعالي صوتها : " أبناءنا فلذات أكبادنا ... "
وحضرتها ما تعرف شي عن عيالها وشو سووا اليوم .



أنا مواطن صالح .. اهم شي عندي الوطن .. وهناك مشروع بيشوف النور مساهمة مني لبلادي ... والأخ الكريم كل فلوسه ومشاريعه من ورا بيع التأشيرات او ( الويزة ) .



جالسة ويا صديقاتها يتناقشن فسالفة الخدم .. وعدد الخدم فالبيوت .. معصبة من العائلات اللي عندها : طباخ .. وشغالة .. ومربية .. وسائق .. ومزارع ..ردت عليها وحدة : " ليش انتو استغنيتوا عن اللي عندكم ؟؟ " هني الاخت ما عرفت
ترد عليها ..



وحدة من ترد من المدرسة .. تدخل حجرتها .. لا غدا .. ولا شياته .. يوم ي**رونها ويدقون عليها الباب ترد عليهم : " أنا اذاكر ما أبا ازعاج " .. أثري البنت مجابلة النت .. ودق هذربان عالشات .



مسئول رفيع المستوى ( حلوة رفيع ) .. المهم يشجب ويستنكر .. ليش كل هذا ؟؟ وين الانسانية ؟؟؟ ........ الخ .. وفالاخير شفناه فالتلفزيون يسلم على اللي يشجبهم ويستنكرهم وهو يضحك ..



موظف محتج .. ما يرقوني .. ما يزيدون راتبي .. ليش يرقون فلان وعلان الا أنا ؟؟؟ وحضرة جنابه يهمل المعاملات ..ويطنش المراجعين .. ووايد يغيب ... وساعات ما يحصلونه فمكتبه .. وكم مرة محققين وياه .. ( لا ويبا يرقونه )



زوج طلع من دورة ( علاقة الأزواج ) .. وتأثر الفقير بالكلام .. يوم رجع البيت قدم لزوجته هدية غاوية .. استغربت الزوجة من فعل الزوج وقالت له : شو المناسبة ؟؟؟ .. قال لها : اليوم عيد زواجنا !! .. مع العلم انه لازم يحتفل بالمناسبة
قبل ( 6 ) أشهر .



دومها أول وحدة تقدم البحوث ... وأسلوبها رائع فالكتابة .. وفي وقت الامتحان زخها المراقب وهي تغش .. ويوم حققوا وياها طلع بعد البحث مضروب .. اقصد تشتريه من المعاهد .



كاشخ .. مرتب ... يوم يمشي الجميع يلتفت صوبه ... سيارة آخر موديل ... وصوت الديسكو حدث ولا حرج .. والرقبة تلعب .. يوم نزل صاحبنا للكوفي شوب .. سألته الجرسونه : Yes sir , what you want ?? ... رد عليها : شو تقولين : انتي معلوم انا شو يطلب كل يوم !!! ( الاخ داش مطعم راجو )



مذيعة جميلة .. كل يوم لها لوك جديد .. اللي يشوفها يقول ما شا الله .. ويوم ترمس يقول عوذ بالله .. المرفوع منصوب .. والمنصوب مجرور ... والقاف كاف ... والناس مجابلة شيفتها مجبورة .. ما نقدر نقول غير انها مذيعة هالعصر ..
( قوم كاسر ملة ) .



فنانة فنها رسالة .. وين هالرسالة اللي تقول عنها ؟؟ .. وهي كل يوم فمركز الشرطة بسبة ضرب فلان وشتم علان ... لا وفي فيلمها الاخير ظاهرة رقيقة وحساسة وما تستحمل اي كلمة ( عجبي يا فن ) ..[/align]