قصيده عجبتني

**المَنْاعِيْ** · 14-Apr-2007, 02:58 AM

في كذا قصيده عجبتني لشاعر واحد وحبيت انزلهم بموضوع واحد واتمنى يعجبوكم مثل ماهم عاجبيني *_^

منتب على خبري

منتب على خبري تغيرت بالحيل

ماهوب قول الناس .. شوفة عيوني
مثلت لي دور المحبين تمثيل

رح كمل المشوار هالحين دوني
دامه حصل بالوضع يازين تبديل

في عزتي للنفس هجرك يهوني
ماقلت يوم اقفيت مااطولك ياليل

مابيك دام الغير بك شاركوني
شكيت جرح من سواياك لسهيل

لاشك نجم سهيل زود شجوني
مليت أنا ماعاد ابي منك تعليل

خلك مع اللي في هواك حسدوني

_______________________

العزا والتهاني

أنا تقبلت العزا بك من العام
كن العزا في موت حبّك تهاني
ياما سهرت الليل لاغبت ماأنام
ترقد وانا ازرع في رجاك الأماني
واثر السعاده في رجا حبك أوهام
لا طاب جرحٍ صابني منك ثاني
جارت على قلبٍ شقى فيك الأيام
أشكيك للي في غلاك ابتلاني
سهرت عليك عيون ماظن تنلام
ذاك أمس .. والا اليوم .. ماجا كفاني
افرح بطيشك .. والغرابيل قدّام
ياطاك من وقتك مثل ماوطاني

_______________________

تذكرتك

تذكرتك وقلبي مسرف الخطوه يبي فرقاك
وفي نفسي بقايا من جروح العام مدفونه
تذكرتك وفي عيني مواري حزن من ذكراك
تلفت يمك الخافق وجاك خطاه مجنونه
وجيتك ثاير العبره .. أحبك من يقول أنساك
غيابك نار .. من يقوى يشيل النار بعيونه
هلا بايامك السودا .. هلا بالحزن في دنياك
رضى قلبي بتعذيبك أبد مايطلب العونه
متى تفرح بك ايامي متى وشلون كيف القاك
متى هالليل في شمسك يذوب ويختلف لونه
تعبت من التعب وينك تعال ومد لي يمناك
حياتي لا خلت من شوفتك ماهيب مضمونه

_______________________

داويت بالنسيان

داويت بالنسيان قلبٍ جرحتيه
دفنت أنا حبك .. وتبقى حياتك
ياللي قتلتي حبنا مارحمتيه
انتي تحسبين الهوى حب ذاتك
ياللي سمعتي بالهوا ماعرفتيه
أنتي تبين الحب درب لغناتك
نسيت حبك ضاع كل الرجى فيه
يكفيك عن حبٍ مضى ذكرياتك
درب النهايه باختيارك مشيتيه
لاتذرفين الدمع هذي سواتك
عهد الهوى اللي بيننا ماحفظتيه
رماك في بحر الضياع التفاتك
باقي بقايا حبنا اللي رفضتيه
ترى المحبه ماتوافق صفاتك
مليت أنا مشوار حبٍ رسمتيه
قلبي يعيش افراح ذكرى وفاتك

_______________________

راجع

راجع تبي قلبي عقب ماتندمت
راجع تبي قلبي على خبرك العام
العام أنادي ياهوى البال وين انت
واليوم حبك ينتظر حكم الاعدام
على الجفا من طول صبري تعلمت
والجرح في قلبي تداويه الايام
خلك بدربك لو مشيت وتعثرت
مسكين .. ياباني قصورك بالاحلام
مجبور أبيعك لو بكيت وتأثرت
وش حيلتي حظي تردى ولا قام
ماعاد لي بالحب مثلك تغيرت
يازين حبك ينتظر حكم الاعدام

_______________________

قضى العمر

قضى العمر ياظالم وأنا اقول عنك اقفيت
وإلا شفت زولك بالصدف هلت أعياني
مشى القلب في ظلك يباريك لو صديت
ولو عفت حبك يوم .. ماعفته الثاني
أنا ماقويت أنسى حنانك ولا ظنيت
سألتك بربك .. وش كلفك نسياني
وأنا اشوف زلاتك بعيني إلا زليت
وش اللي يفيد الشوف والقلب عمياني
أخذت العزا مني ولا قلب لي خليت
وأنا من هواك اليوم حبيت حرماني
عطيتك حياتي ياقمرها ولا رديت
أبي منك لو نظره ترا هجرك أشقاني
أبي قلبك القاسي وراضي بماسويت
تعاتب وتجرحني وتامر وتنهاني
لك الحب مشاني أنا في هواك بليت
أحبك ولو صديت ياكل خـــــلاني