قصيدة الجمهره*للشاعر حامد زيـــــــد

هذه قصيدة من أروع ماكتب الشاعر حامد زيد

بعنوان : الجمهرة :
...........................


إي بالله أخطو
والخطا اللي جابهم عين الصواب

مبطي وأنا أشوف الطمع
يكشف رداهم وأستره

مايملي عيون الحسود بهالزمن
غير التراب
ومن لايتوب من الخطا
تحرم عليه المعذرة

اللي من أولها خراب
أكيد تاليها خراب
والبندق اللي ماتثور في هدفها تذعره



ودك ليا من جاتك الغلطة
من الناس القراب
الصاحب اللي ماكسبت محبته ماتخسره


مشكلتي ..
إني ماعرفت أحسب لصدتهم حساب
قلطتهم صدري
على ذكرى قصيد وحنجرة

صوتٍ .. يصول في منبره
وخطاب مامثله خطاب
والطيبة اللي زعزعت
صوت الخطيب ومنبره

مافيه دمعٍ
صوبوه أحبابي بوجهي وخاب
ولا زرق حزني على غالي
ولا فج أنحره




كل الزهاب اللي معي
ذكرى من أصحاب الزهاب
واللي بقا لي من عذاب
أشرس طريقي وأخطره

لأني تجنبت الغرق
عديت من فوق السحاب
لأن أكثر أصحابي ورق
ماشفت للطيب ثمره



والله ..
ماحطيت بين الحقد والخوة حجاب
حتى غدو ربعي
يحدوني على الضيق أشكره

البارحة ثارت علي أرقاب
و آوتني أرقاب
البارحة
و ياثقل دم البارح ويامحقره


أهب ياوجه الحسد
وشلون جمعهم وغاب
كيف السنين اللي عطتني
بعثرتهم بعثره


أثر المصايب ..
ماتجيك إلا من الناس القراب
وبهالزمن ..
حتى الرفيق اللي تثق فيه إحذره


لابارك الله في رفيقٍ
تزعله كلمة عتاب
ولاجمع الله ..
الرجال اللي تفرقهم مره


عودت نفسي ..
كل ماشددت لليمه ركاب
ماصد وجهي عن طريق ..
إلا لياجبت خبره


الصاحب اللي ..
مايجي من صحبته غير العذاب
نذرٍ علي ..
إن ما هجرني و إلا أنا اللي بهجره

من يفتح لفرقاي باب
أفك له عشرين باب
وإذا خويي ..
مايقدر خوتي ما أقٌدره


إن روٌحوا ..
فأنا بريء منهم ليوم الحساب
وإن جرٌحوا ..
قولو لهم ماحركوا فيٌ شعره

شفهم لهم حول السنة
ولا خذو مني جواب
أحسن دوا
للي حاول يستفزك تحقره


أنا جمٌعت أوراقهم بكتاب
وأغلقت الكتاب
ياوقت لم اللي تلمه
وأنثر اللي تنثره


ماكنت أحاتيهم صغير
عاد أحاتيهم شباب
إما ذخرني صاحبي لليوم الأسود
ما أذخره


عقب إكتئاب البارحة
ما عاد أنا حمل إكتئاب
الطيب جرجرني ..
وأنا ماني بناقص جرجره



اللي يخاف من الظما
يترك لنا طرد السراب
واللي ..
ماهو بقد الظلام و وحشته
لا يسهره



أنا تجرعت الظما
لين إحترق وجهي وذاب
أنا كسرت بخاطري
قبل الصداقة تكسره

أنا خسرت ..
اللي غيابه غير عن كل الغياب
أنا غفرت لعالم
ماتستحق المغفرة

أنا أكثر إنسان تعلم
من كثر ما أخطا وصاب
أنا آخر لسان يتكلم
في زمان الثرثرة

أنا القصيد ..
اللي فزع من دفتره مليون ناب
وأنا الوحيد اللي جمع ..
مليون ناب بدفتره


جفني وجرحه السهر
حيلي و هدته الصعاب
دمعي هدر
ضحكي ندر
عمري وضيعت أكثره


شيبت في قلوب العرب
هيبت روسٍ ماتهاب
جمهرت ناسٍ ..
عمرهم مايعرفون الجمهرة

ماصرت ذيب ..
إلا لأن اللي حواليني ذياب
ماكنت أغيب
إلا لأن العفو عند المقدرة



ترا حلاتك
لاحملت لصاحبك كلمة عتاب
إن مانطقت بها بوجهه
ماتذمه بظهره

بهالزمن ..
مايملي عيون الحسود
إلا التراب

و إلا الحظيظ ..
الطلقة اللي ما تصيبه تذعره



ودك اليامن جاتك الغلطة
من الناس القراب
الصاحب اللي ماكسبت محبته ماتخسره




ودمتم بحفظ الله ورعايته ،،،